ТОШКЕНТ, 23 дек – Sputnik. Нукуслик ўқитувчи фирибгарнинг Нигериядаги ҳисобига 165 млн ўтказди ва фирибгарнинг қурбонига айланди.
ИИВнинг “Постда.уз” нашрининг хабар қилишича, Нукус шаҳридаги мактаблардан бирида ўқитувчи бўлиб ишлайдиган Г.П. интернет тармоғи орқали Марк Роберт исмли шахс билан танишиб қолади. Нотаниш шахс унга АҚШдаги нуфузли компанияга ишга киритиб қўйишини айтиб, ишончига киради.
Фуқаро июнь-август ойлари мобайнида ҳужжатлар, виза, йўлкира ва бошқа “харажатлар” учун жами 165 миллион 323 минг сўм пул маблағини халқаро пул ўтказмалари орқали Нигерия давлатидаги ҳисоб рақамларига ўтказиб юборади. Аммо фирибгар берган ваъдасининг устидан чиқмайди.
Айни пайтда жиноятни содир этган шахсни аниқлаш ва ушлаш чоралари кўрилган.
Ҳолат юзасидан жиноят иши қўзғатилган.