ТОШКЕНТ, 11 дек — Sputnik. Ўзбекистонда хусусийлаштиришда бозор иқтисодиётига хос ва мос тизимга ўтилади. Бу ҳақда давлат иштирокидаги корхоналарни ислоҳ қилиш натижадорлиги ва бу йўналишдаги устувор вазифаларга бағишланган йиғилишда маълум қилинди.
Давлат раҳбари матбуот хизмати хабарига кўра, йиғилишда хусусийлаштиришга оид ёндашувларни тубдан янгилаш ва бу борада бозор иқтисодиётига хос ва мос тизимга ўтиш зарурлиги таъкидланган.
Буни амалга оширишда халқаро экспертлар жалб этилади.
Хусусийлаштириш ва корпоратив бошқарув бўйича мутахассислар тайёрлаш ҳамда малакасини ошириш, давлат иштирокидаги корхоналар раҳбарларини шу борада ўқитиш муҳимлиги қайд этилди.
Эслатиб ўтамиз, аввалроқ Мирзиёев эски усулда, самарасиз ишлаётган давлат иштирокидаги корхоналар фаолиятини жиддий танқид қилгани хабар қилинган эди.