ТОШКЕНТ, 6 дек - Sputnik. Ўзбекистон ИИВ Қозоғистонда паспортларини йўқотиб, яшаш манзилларига қайтолмай, қийин аҳволга тушиб қолган 12 нафар фуқарони Ватанга қайтарди.
Эслатиб ўтамиз, ноябрь ойи охирида Ўзбекистон ва Қозоғистон Ички ишлар вазирликлари Қозоғистон ҳудудида ҳамкорликда "Нолегал" операциясини ўтказган эдилар. Нур-Султон, Олма-Ота ва Чимкент шаҳарларида ўтказилган рейдлар давомида аниқланган - фуқаролик паспортларини йўқотиб яшаш манзилларига қайтолмай, қийин аҳволга тушиб қолган 12 нафар (2 аёл, 10 эркак) фуқарога Ўзбекистонга қайтиш гувоҳномалари берилган.
Бугун улар Ташқи меҳнат миграцияси агентлиги кўмагида "Олма-ота–Тошкент" авиарейси билан Ўзбекистонга олиб келинган.
"Мазкур фуқаролар Ташқи меҳнат миграцияси агентлиги биносига олиб келинди, барчасига тиббий (рентген текширув, қон анализлари текшируви, турли юқумли касалликларга текширув), психологик ва юридик ёрдам кўрсатилди ҳамда яшаш манзилларига етиб олишлари учун энг кам иш ҳақининг бир баровари миқдорида пул маблағлари ажратилди", - дейилган хабарда.
Таъкидланишича, ҳозирги вақтда Ташқи ишлар вазирлиги ҳамда Ташқи меҳнат миграцияси агентлиги хорижий фуқароларни вақтинча ушлаб туриш марказларида сақланаётган 41 нафар фуқарони Ўзбекистонга қайтариш чораларини кўришмоқда.