ТОШКЕНТ, 4 дек - Sputnik. АҚШ Конгресси вакиллар Палатаси Россиянинг "Катта еттилик"даги иштирокига қарши резолюция қабул қилди, деб хабар бермоқда РИА Новости.
Ҳужжат учун 339 конгрессмен овоз беришган, қаршилар – 71. Қарор қонун кучига эга эмас – у тавсиявий характерга эга, шунинг учун ижроия ҳокимияти унга риоя қилишга мажбур эмас.
Резолюцияда айтилишича, Россия қўшниларининг ҳудудий яхлитлигини ҳурмат қилмагунига ҳамда демократик жамият стандартларига риоя қилмагунига қадар "G7"га қайтмаслиги керак.
Илгари ушбу ҳужжат вакиллар палатасининг ташқи ишлар қўмитаси томонидан маъқулланган эди.
G8 форматини эҳтимолий тикланиши хақида сал олдин АҚШ президенти Дональд Трамп август ойида гапирган эди. Ўшанда у Россия етакчиси Владимир Путинни АҚШда бўлиб ўтадиган G7 саммитига таклиф қилиш ниятида эканлигини айтган. Трампнинг сўзларига кўра, Москва билан биргаликда кўплаб халқаро масалаларни муҳокама қилиш мантиққа яқинроқ.
Шунга қарамай, "Еттилик" бу масала бўйича келишувга эриша олмади. Германия канцлери Ангела Меркель G8 форматини қайта тиклаш масаласини Украина низосининг бартараф этилиши билан боғламоқда.
Владимир Путин ўз навбатида, Москва мулоқотга тайёрлигини ва G8 форматини тикланишини истисно этмаслигини, лекин бу асосий мақсад эмаслигини таъкидлаган.