ТОШКЕНТ, 25 окт - Sputnik. 2020 йил январь ойидан бошлаб Тошкентда ягона транспорт карталари амал қилишни бошлайди. Бу ҳақда пойтахт Транспорт бошқармаси бошлиғи Анвар Жўраев “Ўзбекистан 24” телеканалига берган интервьюсида маълум қилди.
“Метрополитеннинг янги бекатларидаги турникетлар бунга мослаштирилган. Картанинг янги тўртта тури жорий этилади: пенсионерлар, талабалар, ўқувчилар учун карта ва имтиёзли карта, шунингдек, умумий ягона транспорт картаси”, - деди Жўраев.
Маълум қилинишича, тўловни телефондаги илова ёки банк карталари билан амалга ошириш мумкин бўлади.
Карталарда эгаларининг сурати туширилган бўлади ва бу карталар давлат хизматлари марказларида берилади.
Ягона транспорт карталаридан фойдаланган ҳолда янги автоматлаштирилган тўлов тизими билан барча турдаги жамоат транспортида фойдаланиш мумкин: автобуслар, Тошкентдаги метро, Самарқанддаги трамвай, Хоразмдаги троллейбус ва ҳоказо.
Эслатиб ўтамиз, аввалроқ Тошкент метро бекатларида Humo карталари билан тўловни амалга ошириш мумкинлиги хабар қилинган эди. Тизим ўз ишини “Буюк Ипак йўли”, “Амир Темур хиёбони”, “Мустақиллик майдони”, “Пахтакор”, “Бунёдкор”, “Мирзо Улуғбек”, “Чилонзор”, “Беруний”, “Минор” ва “Абдулла Қодирий” метро бекатларида бошлаган.