ТОШКЕНТ, 2 окт - Sputnik. 2019 йил 2 октябр куни Россия Федерал Мажлиси Кенгаши раиси Валентина Матвиенко Сенат Раиси Танзила Нарбаева билан учрашувидан сўнг журналистларга икки давлат парламент вакиллари 2020-йилда нишонланадиган Ғалабанинг 75 йиллигига тайёрларлик жараёнини муҳокама қилишганини маълум қилди.
"Ҳамраисларимизга Ғалаба кунини нишонлашимиз ҳақида ўйлаб кўришлари учун топшириқлар бердик. Бу бизнинг умумий ғалабамиз, уруш йилларида фашизм устидан ғалаба қозонган халқларимиз ғалабаси. Парламент линияси бўйича биз тадбирни нишонлашда ўз форматимизни ўйлаб кўрамиз. Бу тадбирга янада кўпроқ ёшлар жалб этилиши ва биз уларга ветеранларимиз олдида миннатдорлик туйғусини сингдирмоғимиз лозим", - деди Матвиенко ҳамда бу каби муҳим саналарга эътибор билан ёндашиш лозимлигини қўшимча қилди.