ТОШКЕНТ, 12 сен - Sputnik. “Истеъмолчилар ҳуқуқларини ҳимоя қилишнинг ҳуқуқий ва институционал тизимини тубдан такомиллаштириш чора-тадбирлари тўғрисида” Ўзбекистон президенти фармони қабул қилинди.
Фармон билан Монополияга қарши курашиш қўмитаси ҳузурида Истеъмолчилар ҳуқуқларини ҳимоя қилиш Агентлиги ташкил этилди.
Агентлик истеъмолчилар ҳуқуқларини ҳимоя қилиш ва реклама бозорини тартибга солиш соҳасида ягона давлат сиёсатини ишлаб чиқади ва амалга оширади.
Фармонга кўра, Агентликка истеъмолчилар ҳуқуқ ва манфаатларини ҳимоя қилиш, уни бузган шахсларга нисбатан чора кўриш учун судга мурожаат қилиш каби ҳуқуқлар берилди.
Шунингдек, Агентлик чакана савдо ва хизмат кўрсатиш шохобчаларида товар ва хизматларнинг назорат харидини ўтказиши, уларни экспертизадан ўтказилишини ташкил қилиши мумкин.
Агентлик ва Қўмитанинг ҳудудий бошқармалари судга киритиладиган даъволар бўйича давлат божи тўлашдан озод қилинади.
Ўзбекистонда гўшт нархи ошиши сабаблари маълум бўлди
Агентликка Қўмита раисининг тақдимномасига биноан Вазирлар Маҳкамаси томонидан лавозимга тайинланадиган ва лавозимидан озод этиладиган директор раҳбарлик қилади.