ТОШКЕНТ, 30 авг - Sputnik. 2019 йил 15 августда қатор халқаро ОАВда террористик фитнани ташкиллаштириш ва 2017 йил 7 апрелда Стокгольм шаҳридаги фожиали воқеаларга алоқадорликда гумонланиб Эстерсунд шаҳрида (Швеция) ўзбекистонлик деб тахмин қилинаётган шахснинг қўлга олиниши тўғрисида хабар тарқалди.
Ўзбекистон Ташқи ишлар вазирлиги хабарида қайд этилишича, ушбу хабарлар юзасидан Ўзбекистоннинг Берлин шаҳридаги элчихонаси ўз консуллик округига кирувчи Швеция қироллиги томонига сўровнома йўллаган.
“29 август куни дипломатик ваколатхона Эстерсунд шаҳри округ судидан қўлга олинган шахснинг Ўзбекистон фуқароси эмаслиги тўғрисида расмий жавоб олди”, - дейилади вазирлик расмий баёнотида.
2017 йил 7 апрель куни Стокгольмнинг марказий кўчаларидан бири бўлган Дроттнинггатан кўчасида юк машинаси ҳайдовчиси одамларни босиб кетган. У 550 метр юриб ўтиб, Ahlens савдо маркази биносига урилган. Ҳужум оқибатида 5 киши ҳалок бўлган, ўндан ортиқ киши жароҳат олган. Стокгольм ҳукумати рўй берган воқеани теракт деб тан олган. Ўзбекистонлик Раҳмат Оқилов Стокгольмдаги терактни ИД амири буйруғи билан амалга оширганини айтган ва суд ҳукми билан умрбод қамоқ жазосига маҳкум қилинган.