ТОШКЕНТ, 14 авг — Sputnik. Қозоғистоннинг “Отар” базаси полигонида миномётчилар ҳисоби ўртасида ўтказилган “Артиллерия олови усталари” халқаро танловининг якуний натижаларига кўра, Ўзбекистон фахрли учинчи ўринни қўлга киритди. Бу ҳақда Мудофаа вазирлиги хабар қилди.
Қозоғистон жамоаси биринчи ўринни эгаллади. Иккинчи ўрин Россияга насиб этди.
Танлов босқичлари: “Индивидуал пойга”, “Тунги спринт” ва “Эстафета”. Техникалар: 120 миллиметрли 2Б11 миномёт, кўп мақсадли енгил тягач ва зирҳланган МТ-ЛБ машинаси.
Танловда Арманстон, Беларусь, Венесуэла, Озарбайжон, Зимбабве, Эрон, Қирғизистон, Қозоғистон, Россия, Сурия, Тожикистон ва Ўзбекистон жамоалари биринчилик учун ўзаро курашди.
Ўзбекистонлик миномётчилар 1- ва 2-босқичлардаги натижаларига кўра, Озарбайжон ва Беларусь жамоалари билан бир қаторда умумжамоа ҳисобида 3-ўринни қўлга киритган эди.
Сўнгги “Эстафета” босқичида эса Қозоғистон ва Россия жамоалари биринчи ва иккинчи ўринда бўлиб олди. Ўзбекистонлик ҳарбий хизматчилар эса кучли учликка киришга муваффақ бўлди.
Эслатиб ўтамиз, аввалроқ Москва вилоятидаги “Алабино” полигонида Ўзбекистон жамоаси “Танк биатлони” мусобақасининг иккинчи дивизионидаги ярим финал баҳсларида яхши натижа кўрсатиб, финалга йўл олгани хабар қилинган эди.