ТОШКЕНТ, 27 июл — Sputnik. Урганч халқаро аэропорти 10 август куни ишга туширилади. Бу ҳақда Хоразм вилояти ҳоким вазифасини бажарувчи Фарход Эрманов Facebook саҳифасида маълум қилган.
Шу ҳафтада вилоят ҳокими вазифасини бажарувчи Ф.Эрманов олиб борилаётган ишлар билан танишиш мақсадида мутасаддилар билан жойига бориб учрашди.
Ҳозирда Урганч халқаро аэропортида сунъий учиш-қўниш йўлагининг асфальт қопламасини алмаштриш бўйича таъмирлаш ишлари жадаллик билан давом этмоқда.
"Бу ерда таъмирлаш ишлари "Хоразмйўлқурилиш" унитар корхонаси томонидан 24 соат давомида 50 дан ортиқ махсус техниклар ёрдамида олиб борилмоқда. Урганч халқаро аэропортининг 10 август куни ишга туширилиши режалаштирилмоқда"- деб ёзган Эрманов.
Эслатиб ўтамиз, Урганч халқаро аэропортининг техник сабаблар ва ҳарорат режими бўйича 16 июлдан вақтинча ёпилганди. Шу сабабли Урганч аэропортидан амалга оширилаётган рейслар Нукус ва Бухоро аэропортларига кўчирилди.