ТОШКЕНТ, 18 май — Sputnik. Москва шаҳрида ўтказилган Меҳрибонлик уйлари тарбияланувчилари ўртасидаги Жаҳон чемпионатида бош совринни қўлга киритган ўзбекистонлик ёш футболчилар Тошкентга қайтиб келди. Бу ҳақда Ўзбекистон Футбол ассоциацияси хабар берди.
Чемпионлар Ислом Каримов номидаги Тошкент халқаро аэропортида Ўзбекистон жисмоний тарбия ва спорт вазирлиги, Миллий олимпия қўмитаси, Футбол ассоциацияси мутасаддилари, чемпион йигитларнинг мураббий ва тарбиячилари, оммавий ахборот воситалари ходимлари, кенг жамоатчилик томонидан тантанали кутиб олинди.
Эслатиб ўтамиз, ўзбекистонлик футболчилар Жаҳон чемпионатида гуруҳ босқичида Покистон (0:0), Россия (2:0) билан куч синашиб, чорак финалга чиқишди.
Чорак финалда Непал терма жамоаси 2:1 ҳисобида мағлуб этилди. Бурунди билан ярим финалда 1:0 ҳисобида ғалаба қозонишди.
Финал учрашувида ўзбекистонликлар иккинчи бор покистонлик рақиблари билан тўқнаш келди. Учрашувнинг асосий вақтида дуранг (1:1) қайд этилгач, пенальтилар баҳси бўлиб ўтди ва унда 6:5 ҳисобида ўзбекистонликлар ғалаба қозонишди.
Қайд этиш керак, Покистон терма жамоаси Жаҳон чемпионатининг амалдаги ғолиби ҳисобланарди.