ТОШКЕНТ, 14 май – Sputnik. Халқ таълими вазирлиги Ўзбекистонда “Йилнинг энг яхши фан ўқитувчиси-2018” танлови бошланганини эълон қилди.
Танлови уч босқичда: туман (шаҳар), вилоят ва республика босқичида ташкил этилган. Унда умумий ўрта таълим муассасаларида фаолият кўрсатаётган педагоглар иштирок этишмоқда.
Биринчи босқич 13-18 май кунлари 11 та ҳудудда ўтказилиб, 13 та ўқув фанидан жами 197 нафар иштирокчи ўзаро беллашади.
Беллашув 4 та шарт бўйича: дарс ишланмаси ва тақдимот, иштирокчининг охирги уч йил давомида эришган ютуқлари, дарс машғулоти ҳамда онлайн тест-синовлари бўйича ўтказилади.
“Мазкур танлов давомида аниқланган илғор тажриба, ўқитишнинг муқобил методлари ва технологиялари Республика таълим маркази мутахассислари томонидан ўрганилади, тажриба-синовдан ўтказилиб, республика миқёсида жорий этилади”, — дейилган хабарда.
Эслатиб ўтамиз, “Йилнинг энг яхши фан ўқитувчиси” танлови Халқ таълими вазирлиги томонидан бир неча йил давомида ўтказиб келинмоқда. Анъанага кўра, танлов ғолиблари “Ўзбекистон Республикаси Халқ таълими аълочиси” кўкрак-нишони ҳамда пул мукофоти билан тақдирланади.