ТОШКЕНТ, 1 май — Sputnik. Ўзбекистонда 1941-1945 йиллардаги уруш фахрийлари ва фашистлар концлагерларининг вояга етмаган собиқ маҳбуслари ва Ленинград шаҳри қамал қилинган даврда ишлаган фуқароларга ҳар ойда зарурий озиқ-овқат ҳамда гигиена маҳсулотлари, ҳар йили кийим-кечак ва пойабзаллар бепул тарқатилади, деб хабар қилди Спутник Ўзбекистон мухбири.
"Режага кўра, "Нуроний" жамғармасининг Қорақалпоғистон Республикаси, вилоятлар ва Тошкент шаҳридаги бўлимлари орқали яшаш жойига ҳар ойнинг 15 санасигача уруш фахрийларига 3 килограмм ун, 1 килограмм гуруч, 500 грамм гречка, 500 грамм макарон, 1 килограмм суяксиз мол гўшти, 1 килограмм уй паррандаси гўшти, 200 грамм сариёғ, 15 дона тухум, 1 килограмм шакар, 1 литр кунгабоқар ёғи, 200 грамм чой, 100 грамм атир совун, 200 грамм хўжалик совуни, 150 грамм кир ювиш кукуни ва 8 дона подгузник бепул етказиб берилади.
Шунингдек, зарур кийим-кечак ва пойабзаллар ҳар йили 1 октябрдан кечиктирилмай тўлов ундирмасдан етказиб берилади.