ТОШКЕНТ, 23 фев — Sputnik. Ўзбекистон ҳукумати ўзбек-тожик давлат чегарасида айрим ўтказув пунктлари фаолиятини тиклаш бўйича қарор қабул қилди, деб хабар қилмоқда Sputnik Ўзбекистон мухбири.
Адлия вазирлиги маълумотларига кўра, яқин вақтларда Самарқанд вилоятидаги "Жартепа", Жиззах вилоятидаги — "Қушкент" ва "Учтурғон", Сирдарё вилоятидаги — "Ховостобод", Тошкент вилоятидаги — "Бекобод", Наманган вилоятидаги — "Поп", Фарғона вилоятидаги — "Равот", Сурхондарё вилоятидаги — "Гулбаҳор" автомобил ўтказиш пунктларидаги инфратузилмаларни яхшилаш бўйича ишлар йўлга қўйилади.
Бундан ташқари, ҳукумат Амузанг темир йўл ўтказиш пункти инфратузилмасини тартибга солишни режалаштирмоқда.
"Ўзбекистон темир йўллари" компаниясига 1 март санасига қадар "Ғалаба — Хошадий" темир йўл участкасининг Ўзбекистондаги қисмини қайта таъмирдан чиқариш ҳамда бу ерда ўтказув пунктини жиҳозлаш топшириғи берилган.
Яна бир муҳим хабар — Самарқанд вилоятида янги ўтказиш пункти пайдо бўлади. У Ургут туманининг Жартепа поселкасида жойлашади.