ТОШКЕНТ, 12 фев — Sputnik. Ўзбекистон Ички ишлар вазирлиги болаларни органлар учун ўғирлаётган жиноий гуруҳлар пайдо бўлгани ҳақидаги миш-мишларни рад этди, деб хабар қилмоқда Спутник мухбири.
Аммо ИИВ ушбу миш-мишларни инкор этди, ва бу хабар ҳақиқатга мос келмаслигини таъкидлади.
"Ўзбекистон ҳудудида болаларни ўғирлаш билан шуғулланадиган жиноий гуруҳлар йўқ. Фарғонада вафот этган қизалоқнинг барча органлари ўз жойида, органларнинг олинганлиги ёки кўчириб ўтказилгани излари мавжуд эмас", — деб таъкидлаган вазирлик.
Ўзбекистонда гоҳ-гоҳида болалар органлар учун ўғирланаётгани ҳақидаги миш-мишлар пайдо бўлиб туради, аммо бу хабарлар ўз тасдиғини топмайди. Шу билан бирга, ўз фарзандларини маълум суммага сотишга рози бўлган ота-оналар ҳақидаги хабарлар берилиб борилади.
Январ ойининг охирида Фарғона вилоятида болалар савдоси билан боғлиқ икки ҳодисанинг олди олинган. Биринчи ҳолатда она ўзининг уч ойлик зурриёдини 13 минг долларга пулламоқчи бўлган бўлса, иккинчи ҳолатда — уч яшар бола учун етти минг доллар сўраган.