Путин ва Трамп шахсий учрашувда катта келишувларга эришиши мумкин — Песков
© Sputnik / Сергей Гунеев
/ Oбуна бўлиш
Песков: Путин ва Трампнинг сўнгги суҳбати ўз позицияларида қатъий турган, бироқ бир-бирини тинглашга тайёр одамлар ўртасидаги прагматик суҳбат бўлди.
ТОШКЕНТ, 20 июл — Sputnik. Владимир Путин ва Дональд Трампнинг шахсий учрашуви албатта бўлиб ўтади, унда президентлар йирик келишувларга эришиши мумкин, деди Россия президенти матбуот котиби Дмитрий Песков “Россия 1” журналисти Павел Зарубинга.
“Эҳтимол, бу (учрашув. - таҳр.) катта ҳажмдаги ишлар амалга оширилгандан сўнг якунда эришиладиган баъзи йирик келишувларни қайд этиш учун ҳам зарурдир. Лекин бу вақт ҳали келгани йўқ. Бу иш ҳали бажарилиши керак”, - дея таъкидлади у.
Песковнинг бошқа баёнотлари
Путин ва Трампнинг сўнгги суҳбати ўз позицияларида қатъий турган, бироқ бир-бирини тинглашга тайёр одамлар ўртасидаги прагматик суҳбат бўлди.
Украина келишуви узоқ ва қийин жараён бўлиб, у куч талаб қилади ва Вашингтон буни тобора кўпроқ тушунмоқда.
“Трамп - дунёдаги энг йирик давлат, дунёдаги энг йирик иқтисодиётнинг президенти. Қолаверса, ҳамма унинг, таъбир жоиз бўлса, анча қаттиқ ва тўғридан-тўғри риторикасига кўникиб қолган. Шу билан бирга, у тинч йўл билан келишувга эришиш учун қўлидан келган барча ишни қилиш ниятини тасдиқлайди”, - дейди Песков.
Путин Украинадаги вазиятни имкон қадар тезроқ тинч йўлга ўтказиш истаги ҳақида бир неча бор гапирган.
Россия бу масалада тезда ҳаракат қилишга тайёр, аммо Москва учун асосий нарса ўз мақсадларига эришишдир.
“Мақсадларимиз аниқ, равшан, улар ўзгармайди”, - деди Песков.
