Стандартлаш ва сертификатлаш тизими тартибга солинади — президент
17:25 18.04.2025 (янгиланди: 17:36 18.04.2025)
© Пресс-служба президента Узбекистана
Oбуна бўлиш
Техник тартибга солиш агентлиги, Санэпидқўм, Ветеринария қўмитаси, Карантин агентлиги каби ташкилотларнинг хулоса бериш тартиби аниқ белгиланади.
ТОШКЕНТ, 18 апр — Sputnik. Ўзбекистон президенти Шавкат Мирзиёев бугун бўлиб ўтган видеоселектор йиғилишида стандартлаштириш ва сертификатлаштириш тизимидаги эскирган талаблар ва бюрократия тадбиркорларнинг “қўлини боғлаётгани”, соҳада коррупцияни келтириб чиқараётгани кўрсатиб ўтди.
"Хусусан, 25 мингдан ортиқ стандарт, 41 та техник регламент халқаро бозор талабларига мос келмайди. Ҳозирда 13 мингга яқин турдаги товарнинг 6,5 минги мажбурий сертификатланади, бу эса таннархни оширади", - деди президент.
Соҳадаги муаммлар:
сут ва гўшт маҳсулотлари ишлаб чиқарувчилари Санэпидқўм хулосасини олиш тизимидан норози;
болалар озуқаси ишлаб чиқарувчи завод қурган тадбиркор, стандарт йўқлиги туфайли Санэпидқўм хулосасини ола олмаяпти;
айрим туман санэпидхизматлари битта маҳсулотнинг ҳар хил қадоқланган партиясини алоҳида синовдан ўтказишни талаб қилмоқда;
минерал сув ишлаб чиқарувчилар турли жойдан 45 та кўрсаткич бўйича хулоса олиши керак;
мева-сабзавот ва дуккакли экинлар сифатини текшириш учун 3 та лабораторияга бориш керак. Энг ёмони, бу лабораторияларнинг хулосаси ривожланган давлатларда тан олинмайди. Экспортчилар қиммат бозорга чиқишдан олдин сертификат олиш учун хорижга намуна жўнатаяпти;
четдан келадиган витринали совуткичларни сертификациялаш жараёни 3 ойгача чўзилмоқда;
курьерлик хизмати учун олиб келинаётган мопед 300 доллар турса, уни стандартдан ўтказиб, сертификат олишга яна шунча маблағ кетмоқда;
айрим тиббий ускуналарни Фармқўмитада рўйхатдан ўтказиш харажати уларнинг нархидан 10 карра қиммат” ва 4-5 ойга чўзилмоқда.
Ушбу муаммоларни ҳисобга олган ҳолда Мирзиёев сертификатлаштириш ва стандартлаштириш тизимини такомиллаштириш бўйича фармон эълон қилинишини билдирди.
Алоҳида фармон билан Техник тартибга солиш агентлиги, Санэпидқўм, Ветеринария қўмитаси, Карантин агентлиги каби идораларнинг маҳсулотга хулоса бериш ваколатлари аниқ белгилаб берилади.
Бунда такрорланувчи ва устма-уст тартиблар босқичма-босқич бекор қилинади. Шунингдек, хавф даражаси юқори бўлган 7 та товар гуруҳидаги маҳсулотларни давлат рўйхатидан ўтказиш амалиёти бекор қилинади.
Сертификат олиш мажбурий бўлган товарлар рўйхатини кескин қисқартириб, маҳсулот мувофиқлигини декларациялаш амалиёти жорий қилинади.
Асбоб-ускуна, хомашё, махсус техника, транспорт импортида Ўзбекистонда тан олинадиган хорижий юқори сифат ва назорат тизимлари мезонлари ишлаб чиқилади, улар импорт қилинаётганда миллий сертификат олиш талаб қилинмайди.
“Бир сўз билан айтганда, биз маҳсулотларнинг бозорга киришини енгиллаштириб, уни реализациясидаги назоратни кучайтирамиз. Бу халқаро амалиётда ўзини оқлаган”, - деди президент.
Ундан ташқари, синов ва сертификатлаштириш бўйича давлат лабораториялари хусусий секторга инвестиция киритиш шарти билан берилса, соҳада сифат ва рақобат бўлиши, хизмат нархи тушиши кўрсатиб ўтилди.
