Шавкат Мирзиёев Андижон халқаро аэропортини бориб кўрди
12:16 15.04.2025 (янгиланди: 12:21 15.04.2025)
© Пресс-служба президента Узбекистана
Oбуна бўлиш
Андижон халқаро аэропортида парвозлар сони оширилади.
TOШКЕНТ, 15 апр — Sputnik. Ўзбекистон президенти Шавкат Мирзиёев ҳудудлар ривожи, аҳоли ҳаёти билан яқиндан танишиш мақсадида Андижон вилоятига келди, дея хабар берди давлат раҳбари матбуот хизмати.
Ташриф чоғида давлат раҳбарига Андижон халқаро аэропортидаги модернизaция ишлари ҳақида ахборот берилди.
Шавкат Мирзиёев Андижон вилоятига келди
© Пресс-служба президента Узбекистана
“Бугунги кунда реконструкция ишларининг биринчи босқичи битказилди. Узунлиги 3 минг 300 метр, кенглиги 60 метр бўлган янги учиш-қўниш йўлаги, юриш йўлаги ва самолётлар тўхташ жойи қурилди. Дренаж тизими янгиланиб, ер ости суви қочирилди. Шунингдек, бу ерда иккинчи юриш йўлаги қурилиши давом эттирилиб, IKAО CАТ-II тоифасидаги радар, метеорология ва ёритиш ускуналарини ўрнатиш ишлари олиб борилмоқда”, — дейилади хабарда.
Натижада Boeing, Airbus русумидаги йирик самолётларни ҳам, ноқулай об-ҳаво шароити ва тунги вақтларда ҳам қабул қилиш мумкин бўлади. Бу кунлик парвозлар сонини 10 баробаргача ошириш имконини беради.
Андижон халқаро аэропорти
© Пресс-служба президента Узбекистана
“Энди иккинчи босқичда йўловчи терминалини янгидан қуриш кўзда тутилган. Бу орқали йўловчиларга хизмат кўрсатиш қуввати соатига аввалги 300 тадан 1000 тага, парвозлар сони йилига 584 тадан 3 минг 700 тага ортади. Бу Андижон шаҳри ва Фарғона водийсига қатновлар сонини кўпайтиришга хизмат қилади”, — дейилган хабарда.
Фаолиятини қайта бошлаган аэропортда ҳозирда Тошкент – Андижон – Тошкент йўналиши бўйича парвозлар амалга оширилмоқда.
Андижон халқаро аэропорти
© Пресс-служба президента Узбекистана
Маълум қилинишича, ўтган йилларда Самарқанд, Термиз, Урганч, Шаҳрисабз, Мўйноқ, Қўқон ва Зомин аэропортлари янгиланди. Яна бир қатор вилоятларда модернизация жараёнлари давом этмоқда.
Эслатиб ўтамиз, Андижон халқаро аэропорти 20 мартдан мунтазам йўловчи қатновларини қабул қила бошлади.
