Кам таъминланган оилаларга электр ва газ тўловларида давлат компенсацияси жорий этилади
© Sputnik / Рамиз Бахтияров
Oбуна бўлиш
Иситиш мавсумида эҳтиёжманд оилаларга 1 миллион сўм миқдорида бир марталик ёрдам берилади.
ТОШКЕНТ, 6 апр — Sputnik. Кам таъминланган оилаларга электр ва газ тўловларида давлат компенсацияси жорий этилади. Бу ҳақда президентнинг тегишли қарори имзоланди.
Ҳужжатга кўра, шу йил 1 майдан 2027 йил 1 апрелга қадар "Ижтимоий ҳимоя ягона реестри" ахборот тизими орқали болалар нафақаси ва моддий ёрдам олувчи ҳамда Камбағал оилалар реестрига киритилган, шунингдек, Реестрларга киритилмаган, бироқ моддий аҳволи бўйича кам таъминланган оилалар мезонларига тўғри келувчи, оиладаги жон бошига даромади минимал истеъмол харажатларининг 1,5 баробаридан ошмайдиган оилаларга:
электр энергияси истеъмоли бўйича – ойига базавий меъёрдан 150 кВт соатгача;
табиий газ истеъмоли бўйича – иситиш мавсумида ойига базавий меъёрдан 250 куб метргача, бошқа даврларда ойига базавий меъёрдан 150 куб метргача ортиқ фойдаланилган қисми учун базавий меъёр доирасидаги ҳамда базавий меъёрдан ошган нархлар ўртасидаги фарқ компенсация қилиб берилади.
Иситиш мавсумида эҳтиёжманд оилаларга 1 миллион сўм миқдорида бир марталик ёрдам берилади.
2025/2026 йилги иситиш мавсумида аҳолининг эҳтиёжманд қатламини қўшимча моддий жиҳатдан қўллаб-қувватлаш мақсадида жорий йилнинг ноябр ойида қуйидаги оилаларга 1 миллион сўмдан бир марталик моддий ёрдам ажратилади:
Реестрларга киритилган оилаларга;
"маҳалла еттилиги" хулосаси асосида Реестрларга киритилмаган, бироқ ёрдамга муҳтож оилаларга.
Бунда "маҳалла еттилиги" томонидан қўшимча рўйхат шакллантирилишида биринчи навбатда, қуйидагилар инобатга олинади:
боқувчисини йўқотган оилалар, аъзолари I ёки II гуруҳ ногирони бўлган шахслардан иборат бўлган оилалар
ногиронлиги бўлган болаларни парваришлаётган оилалар
узоқ муддатли даволанишни талаб этадиган касалликлар билан касалланган шахслар яшовчи оилалар
ўзгалар парваришига муҳтож бўлган ёлғиз яшовчи шахслар ҳамда ёлғиз яшовчи кексалар ва ногиронлиги бўлган шахслар
уч ва ундан ортиқ оила яшайдиган хонадонларда ҳамда газ таъминоти бўлмаган ва марказлаштирилган тартибда иситилмайдиган кўп қаватли уйларда яшовчи оилалар.
Қўшимча равишда шакллантириладиган рўйхатдаги оилалар сони Реестрларга киритилган оилалар сонининг 40 фоизидан ошмаслиги лозим.
