Ўзбекистонлик бизнес вакиллар Беларусдаги биржа савдоларига жалб этилади
© Белорусская универсальная товарная биржа
Oбуна бўлиш
Ўзбекистон ва Беларусь биржа савдоларидаги ҳамкорликни кенгайтирмоқчи.
TOШКЕНТ, 4 март — Sputnik. Беларусь биржа платформасидаги савдоларга ўзбекистонлик бизнес вакиллар жалб этилади. Бу ҳақда Беларусь универсал товар биржаси (БУТБ) матбуот хизмати хабар берди.
Ўзбекистоннинг Беларусдаги элчиси Раҳматулла Назаров ва БУТБ бошқаруви раиси Александр Осмоловский биржа марказий офисида учрашди.
Беларусь и Узбекистан намерены расширять биржевую торговлю
© Белорусская универсальная товарная биржа
Қайд этилишича, БУТБ ва Ўзбекистоннинг Беларусдаги элчихонаси 2025 йилда биржа платформасидаги савдоларга имкон қадар кўпроқ ўзбекистонлик бизнес вакилларини жалб этиш мақсадида биржа соҳасида яқин ҳамкорликни йўлга қўйишни режалаштирмоқда.
Томонларнинг фикрича, айнан Ўзбекистон тадбиркорлик субъектларининг экспорт-импорт фаолиятида биржа механизмидан фойдаланиш имкониятлари тўғрисида етарли маълумотга эга эмаслиги Беларусь ва Ўзбекистон ўртасидаги биржа савдо айланмасининг юқори ўсиш суръатларига эришишга тўсқинлик қилаётган асосий омил ҳисобланади.
“Билишимча, ўтган йил якунларига кўра, платформангизда ўзбекистонлик иштирокчиларнинг транзакциялари миқдори 3 баробарга ошган. Бу ҳайратланарли натижа, аммо ишончим комилки, мамлакатларимиз ўртасида биржа савдоси соҳасидаги ҳамкорлик салоҳияти анча кенг. Савдо-иқтисодий алоқаларни мустаҳкамлаш элчихонанинг асосий вазифаларидан бири бўлганлиги ва биржа бунга энг тўғридан-тўғри алоқадорлиги сабабли биз Беларусда ҳам, Ўзбекистонда ҳам алмашинув семинарлари, конференциялари ва форумларини ташкил этишда ёрдам беришга тайёрмиз. Шу билан бирга, тадбирларнинг самараси максимал бўлиши учун республиканинг барча ҳудудларидан компанияларни жалб этишга ёрдам берамиз”, — деди Раҳматулла Назаров.
Александр Осмоловский Ўзбекистон дипломатик миссияси раҳбарининг таклифини қўллаб-қувватлади.
“Биз Ўзбекистон билан кўп соҳаларда ҳамкорлик қилмоқдамиз. Бунга биржа савдоси, таълим хизматлари, биржа товарлари учун умумий нарх кўрсаткичларини шакллантириш, Халқаро биржалар ассоциацияси доирасидаги ўзаро ҳамкорлик киради. Бундан ташқари, санаб ўтилган соҳаларнинг ҳар бирида амалий натижалар ва ижобий динамика мавжуд. Бу борада мамлакатларимиз биржа бозорларининг ўхшашлигини қайд этмасликнинг иложи йўқ, бу, албатта, ўзбекистонлик ҳамкорлар билан ишлашни соддалаштиради ва ҳар икки томон учун ҳам фойдали бўлган қўшма лойиҳаларни муваффақиятли амалга ошириш имконини беради”, — таъкидлади БУТБ бошқаруви раиси.
Маълумот учун, 2025 йил 28 февраль ҳолатига кўра, БУТБда 188 нафар Ўзбекистон резиденти, жумладан, учта биржа брокери аккредитациядан ўтган. Январь-февраль ойларида ўзбекистонлик иштирокчилар умумий қиймати 15,8 миллион долларлик битимлар тузишди, бу 2024 йилнинг шу даврига нисбатан 1,5 баравар кўп.
