Ўзбекистон ва Малайзия ўртасида янги келишувлар амалга оширилади — тафсилотлар
© Пресс-служба президента Узбекистана
Oбуна бўлиш
Етакчилар 2025-2026 йилларни Ўзбекистон-Малайзия шериклигини инновацион ривожлантириш даври деб эълон қилишга келишиб олишди.
TOШКЕНТ, 5 фев — Sputnik. "Пердана Путра" ҳукумат мажмуасида Ўзбекистон президенти Шавкат Мирзиёев ва Малайзия бош вазири Анвар Иброҳим тор доирада ва расмий делегациялар иштирокида музокара ўтказди, деб ёзмоқда давлат раҳбари матбуот хизмати.
Хабарга кўра, ташриф арафасида таҳлилий марказлар учрашуви, Ўзбекистоннинг туризм салоҳияти ва маданий мероси тақдимотлари, етакчи олий таълим муассасалари ректорлари форуми ўтказилди.
“Ҳамкорликни ривожлантириш ва олий даражадаги келишувлар ижросини самарали мувофиқлаштириш мақсадида Ташқи ишлар вазирларининг стратегик мулоқоти платформасини ташкил этишга қарор қилинди. Бирлашган Миллатлар Ташкилоти, Ислом ҳамкорлик ташкилоти ва бошқа халқаро тузилмалар доирасида ўзаро қўллаб-қувватлашни давом эттириш муҳимлиги қайд этилди”, — дейилади хабарда.
Савдо-иқтисодий ва инвестиция соҳаларидаги амалий ҳамкорлик масалаларига ҳам алоҳида эътибор қаратилди.
Президент Республики Узбекистан Шавкат Мирзиёев и Премьер-министр Малайзии Анвар Ибрагим провели переговоры в узком составе и с участием официальных делегаций.
© Пресс-служба президента Узбекистана
“Товар айирбошлашни кўпайтириш мақсадида Имтиёзли савдо тўғрисидаги битимни ишлаб чиқиш, ўзаро саноат кўргазмаларини ўтказиш, Саноат кооперацияси дастурини қабул қилишга келишиб олинди. Малайзия ҳукумати Ўзбекистоннинг Жаҳон савдо ташкилотига аъзо бўлишини фаол қўллаб-қувватламоқда. Етакчилар 2025-2026 йилларни Ўзбекистон-Малайзия шериклигини инновацион ривожлантириш даври деб эълон қилишга келишиб олдилар”, — дея қайд этилган хабарда.
Шунингдек, иқтисодий ҳамкорликнинг янги моделининг устувор йўналишлари белгилаб олинди: нефть-кимё ва кимё, электроника ва яримўтказгичлар саноати, инновацион саноат, "ақлли" қишлоқ хўжалиги, "яшил" энергетика, зиёрат туризми ва бошқалар.
Айтилишича, Тошкент вилоятида Малайзиянинг етакчи компанияси бошқарувида махсус иқтисодий зона ташкил этилмоқда.
Жорий йилда Ўзбекистон ва Малайзияда маданият ҳафталиклари ўтказилади.
Етакчилар минтақавий ҳамкорликнинг долзарб масалалари юзасидан ҳам фикр алмашишди. Терроризм, радикализм ва исломофобияга қарши курашда саъй-ҳаракатларни бирлаштириш муҳимлиги қайд этилди.
Президент Республики Узбекистан Шавкат Мирзиёев и Премьер-министр Малайзии Анвар Ибрагим провели переговоры в узком составе и с участием официальных делегаций.
© Пресс-служба президента Узбекистана
“Музокаралар якунида эришилган келишувларни ўз вақтида ва сифатли амалга ошириш бўйича "йўл харитаси"ни тайёрлашга қарор қилинди”, — дейилади хабарда.
Учрашув якунида Шавкат Мирзиёев Анвар Иброҳимни расмий ташриф билан Ўзбекистонга келишга таклиф этди.
Эслатиб ўтамиз, Ўзбекистон президенти Шавкат Мирзиёев Малайзия бош вазири Анвар Иброҳимнинг таклифига биноан 4-5 февраль кунлари расмий ташриф билан ушбу мамлакатда бўлиб турибди.
