ХАЭА Ўзбекистонда “Росатом” иштирокида кам қувватли АЭС қурилишини қўллаб-қувватлади
14:08 05.12.2024 (янгиланди: 16:20 05.12.2024)
© Пресс-служба президента Узбекистана
Oбуна бўлиш
Эксклюзив
Самарқандда Ислом ҳамкорлик ташкилотига аъзо давлатларда атом энергиясидан фойдаланиш бўйича халқаро конференция бўлиб ўтмоқда.
TOШКЕНТ, 5 дек — Sputnik. Халқаро атом энергияси агентлиги (ХАЭА) Ўзбекистон ҳукуматига Россиянинг “Росатом” давлат корпорацияси иштирокида кам қувватли атом электр станциясини қуриш лойиҳасини амалга оширишда ёрдам беради. Бу ҳақда агентлик раҳбари Рафаэль Гросси Самарқандда бўлиб ўтаётган конференцияда маълум қилди.
Самарқандда Ислом ҳамкорлик ташкилотига (ИҲТ) аъзо давлатларда атом энергиясидан фойдаланиш бўйича халқаро конференция бўлиб ўтмоқда.
Тадбирнинг очилиш маросимида президентнинг анжуман иштирокчиларига мурожаати ўқиб эшиттирилди.
"Конференция кун тартибига соҳадаги фаолиятни МАГАТЭ билан мувофиқлаштирган ҳолда АЭСлар барпо этиш, уларнинг хавфсизлигини таъминлаш, ядро технологияларини ривожлантиришнинг экологик жиҳатлари каби ўта долзарб масалалар киритилган. Шунингдек, инновациялар, ядровий тиббиёт, соҳада таълимни ривожлантириш ва малакали кадрлар тайёрлаш масалаларига ҳам алоҳида эътибор қаратилади, деб ишонаман. Аминманки, анжуман давомида муҳокама қилинадиган барча ғоя ва ташаббуслар ушбу муҳим тармоқда ўзаро мулоқотни ва халқаро ҳамкорликни кенгайтириш, энергетик хавфсизликни мустаҳкамлаш, давлатларнинг барқарор тараққиётини таъминлашга хизмат қилади. Ўзбекистон барча хорижий ҳамкорлар билан ушбу устувор йўналишда яқин ҳамкорлик қилишга доим тайёрдир", — деди Ўзбекистон етакчиси.
ХАЭА раҳбари агентлик Ўзбекистон ҳукуматига технологик ёрдам кўрсатишини, жумладан, қонунчиликни ўзгартириш ва мамлакат ядровий дастурининг узлуксизлигини таъминлаш учун зарур бўлган зарур кадрлар салоҳиятини яратишни таъкидлади.
“Ўзбекистон кичик модулли реакторлар яратиш ва, эҳтимол, келажакда ундан ҳам кўпроқ нарсани ўз ичига олган аниқ лойиҳа бўйича олдинга силжишга қарор қилди. Бу эса кеча президентга (Ўзбекистон – таҳр.) айтганимдек, ХАЭА ҳар қадамда ҳозир бўладиган ташаббус”, — деди Гросси.
"Ўзатом" ХАЭА билан ҳамкорликни ривожлантириш бўйича ишчи гуруҳ ташкил этиш ҳақида келишув имзолади.
Май ойида Тошкентда атом энергетикаси тарихида кам қувватли атом электр станциясини қуриш бўйича биринчи экспорт шартномаси имзоланган эди. Лойиҳа Ўзбекистоннинг Жиззах вилоятида Россия лойиҳаси бўйича қуввати 330 МВт бўлган атом электр станцияси – ҳар бири 55 МВт қувватга эга олтита РИТМ-200Н реакторини қуришни назарда тутади.
Сентябрь бошида “Ўзатом” ва “Атомстроэкспорт” (“Росатом”нинг муҳандислик бўлими) ўртасида бўлажак станция қурилиш майдончасида ишларни бошлаш тўғрисида протокол имзоланган эди. 2026 йил бошида “Ўзатом” станция қуриш учун рухсат олишни режалаштирмоқда.
