Олий суд сайлов жараёнининг қонуний ўтишига сабаб бўлган омилларни маълум қилди
10:42 28.10.2024 (янгиланди: 10:49 28.10.2024)
© Sputnik / Владимир Алексеев
Oбуна бўлиш
Олий суд раиси ўринбосари Шуҳрат Полвоновнинг сайлов юзасидан брифинги бўлиб ўтди.
ТОШКЕНТ, 28 окт — Sputnik. Сайлов жараёни қонун нормаларига мувофиқ, юқори савияда ўтди. Бу ҳақда Олий суд раиси ўринбосари Шуҳрат Полвонов брифингда маълум қилди.
Унинг сўзларига кўра, ўтган вақт давомида Маъмурий жавобгарлик тўғрисидаги кодекснинг 51 прим 3-моддасида назарда тутилган сайлов комиссияси қарорларини ижро этмаслик ҳуқуқбузарлигига оид 1 та, 51 прим 5-моддасида назарда тутилган сайлов олди ташвиқотини олиб бориш шартлари ва тартибини бузиш ҳуқуқбузарлигига оид 1 та, 51 прим 7-моддасида назарда тутилган ахборот ҳамда ташвиқот материалларига қасддан шикаст етказиш ҳуқуқбузарлигига оид яна 2 та ишлар судлар томонидан кўриб чиқилди. Улар юзасидан қарорлар қабул қилинди.
“Олинган ахборотларга кўра, республика судларига ўтказилаётган сайлов жараёнлари билан боғлиқ бошқа мурожаатлар бўлмади. Сайловга тайёргарлик кўриш жараёнлари бошланганидан бугунги кунга қадар сайлов ўтказувчи комиссияларнинг фаолиятига аралашиш, уларнинг ишларига тўсқинлик қилиш, мурожаатларини кўриб чиқишни ғайриқонуний тарзда рад этиш, кўриб чиқиш муддатларини бузиш билан боғлиқ маъмурий ҳуқуқбузарлик ишлари судларга келиб тушмаган”, — дея қайд этди у.
Олий суд раиси ўринбосарининг таъкидлашича, сайлов жараёни қонун нормаларига мувофиқ, юқори савияда ўтганлигини эътироф этиш мақсадга мувофиқ.
“Бунга қуйидаги омиллар хизмат қилди: биринчидан, аҳолининг ҳуқуқий онги ошганлиги, ушбу сиёсий жараён хеч кимни бефарқ қолдирмаганлиги, сайлов очиқ, шаффоф ва ошкора ўтказилганлиги. Иккинчидан, МСК томонидан сайлов жараёни қонунчиликка мувофиқ ташкил этилиб, сайлов ўтказувчи комиссияларнинг тўғри йўлга қўйилганлиги. Учинчидан, хар қандай масалада фуқаролар, шунингдек кузатувчилар, ОАВ вакиллари билан тегишли мулоқот ўрнатилиб, уларга ўз вақтида керакли тушунтириш ва маълумотлар берилганлиги учун, оддий қилиб айтганда судларга мурожаат қилишда ўрин ва зарурат қолмаган деб ҳисоблаймиз”, — деди Полвонов.
Эслатиб ўтамиз, 27 октябрь куни парламент сайловларида овоз бериш жараёни бўлиб ўтди. Ўзбекистонда парламент сайловлари илк бор аралаш мажоритар-пропорционал тизим асосида ўтказилди. Сайловларни ўтказиш учун 10 717 та сайлов участкаси ташкил этилган, улардан 57 таси 40 та давлатда, шу жумладан, 7 таси Россияда. Ўзбекистондаги парламент сайловларини МДҲ ПАдан 60 нафардан ортиқ кузатувчи кузатиб борди.
