Илмий ва ишлаб чиқариш имкониятлари бўлса, Россия ҳар қандай вазифани ҳал қилади — Путин
© Sputnik / Дмитрий Астахов
/ Oбуна бўлиш
Россия Федерацияси раҳбари Стратегик ташаббуслар агентлиги учун йиллик мукофот таъсис этишни таклиф қилди.
ТОШКЕНТ, 23 май — Sputnik. Илмий ва ишлаб чиқариш имкониятлари мавжуд бўлса, Россия ҳар қандай вазифани ҳал қилади. Бу ҳақда Россия Федерацияси раҳбари Владимир Путин Стратегик ташаббуслар агентлиги (СТА) кузатув кенгаши йиғилишида маълум қилди.
“Агар биз илмий ва ишлаб чиқариш жамоалари, муҳандислик, тадбиркорлик, ижодий жамоалар, кўнгиллилар ва нотижорат ташкилотлари, нотижорат сектор вакиллари учун имкониятларни кенгайтиришда давом этсак, биз иқтисодиётнинг ўсишини ва Россия оилаларининг фаровонлигини таъминлаймиз, биз, албатта, энг катта вазифаларни ҳал қиламиз”, — деди у .
Президентнинг таъкидлашича, барча режаларни амалга ошириш ва ташқи муаммоларга муваффақиятли жавоб бериш учун "ҳокимиятнинг барча даражаларининг мувофиқлаштирилган ҳаракатлари ва, албатта, бутун жамиятнинг иштироки, деярли ҳар бир фуқаронинг мамлакат ривожига қўшган ҳиссаси керак".
Президент йииғилишдан аввал СТА фаолиятининг асосий йўналишларига бағишланган “Технологик суверенитет” кўргазмасини кўздан кечирди. Кўргазма "Точка кипения Арбат" майдонида жойлашган. Бу махсус майдон бўлиб, унда маърузалар, семинарлар, маҳорат дарслари ва Агентликнинг ишбилармон ўйинлари ўтказилади.
2013 йилдан бери Россиянинг 71 та ҳудудида 182 та "қайноқ нуқтаси" яратилган. Путинга Стратегик ташаббуслар агентлигининг 2030 йилгача бўлган иш режалари тақдим этилди.
Асосий вазифа – ҳудудларнинг ижтимоий-иқтисодий ривожланишини қўллаб-қувватлаш. Агентлик фаолияти бешта ташаббус (ижтимоий, кадрлар, технологик, экологик ва тадбиркорлик) доирасида тузилган ва 2030 йилгача ва 2036 йилгача миллий ривожланиш мақсадларига эришишга хизмат қилади.
Шунингдек, президентга технологик суверенитетни таъминлаш соҳасида ечим топиш учун агентлик томонидан қўлланиладиган усуллар ва таснифлар ҳақида сўзлаб берилди.
Россия раҳбари агентликнинг “ВЭБ.РФ” (Давлат тараққиёт корпорацияси) билан ҳамкорликда ишлаб чиқилган Азов вилоятини 2040 йилгача барқарор ривожлантириш стратегияси билан танишди. Ҳужжат тўртта янги ҳудудни ривожлантириш ва Донбасснинг кўмир ва металлургия саноатини модернизация қилиш режалари билан биргаликда амалга оширилади.
Владимир Путин Стратегик ташаббуслар агентлигига Федерал Мажлисга йўллаган мурожаатига киритилган таклифлар учун миннатдорчилик билдирди.
Россия Федерацияси раҳбари СТА учун йиллик мукофот таъсис этишни таклиф қилди.
“Мамлакат ва жамият учун аҳамияти ва қиймати юқори бўлган лойиҳалар етакчилари алоҳида рағбатлантиришга лойиқ, деб ҳисоблайман. Шу боис уларни ҳар йили Агентликнинг махсус мукофоти билан тақдирлаш таклифи бор”, — деди Россия президенти.
Путин, шунингдек, қуйидагиларни қайд этди:
Агентлик томонидан қўллаб-қувватланадиган фуқаролик тадбиркорлик ташаббуслари миллий лойиҳаларда акс эттирилиши керак;
технологик суверенитетнинг барча миллий лойиҳаларини ишлаб чиқишда Миллий технология ташаббус иштирокчиларини жалб қилиш, илғор ишлаб чиқаришларни ривожлантириш режаларини, кадрлар малакасини ошириш механизмларини ва технология бизнесига кўмаклашишни шакллантиришда инноваторлар ва тадбиркорларнинг фикрларини албатта ҳисобга олиш зарурлиги;
дўст давлатлар, биз билан ишлашни хоҳловчилар билан ҳамкорликни ривожлантириш йўлидан бориш, биргаликда мамлакатлар фуқаролари ва иқтисодиёти учун зарур бўлган маҳсулот ва инновацияларни яратиш керак;
технологик соҳадаги қарорлар самаралироқ бўлиши керак, чунки "ёмон ниятлилар учун Россия Федерациясини чеклаш қийинроқ бўлади".
Бундан ташқари, Россия раҳбари махсус ҳарбий операция иштирокчиларини қўллаб-қувватловчи, махсус лойиҳаларни амалга оширадиган ва технологик суверенитетни мустаҳкамлашга ҳисса қўшадиган компаниялар учун рағбатлантириш тизимини ишлаб чиқишни таклиф қилди.
Россия президенти одамларнинг фаровонлигини мамлакат расмийларининг барча ишларини баҳолашнинг энг муҳим мезони деб атади ва ҳар йили агентлик ташкил этадиган 2023 йил учун минтақалардаги сифат рейтинги натижаларини кўриб чиқишни таклиф қилди.
