Ўзбекистон ва Россия экология соҳасида ҳамкорликни ривожлантиришга келишиб олди
10:00 19.05.2024 (янгиланди: 10:14 19.05.2024)
Oбуна бўлиш
Иқлим ўзгариши оқибатларини юмшатиш ва унга мослашиш учун кадрлар салоҳиятини ошириш, махсус семинар ва тренинглар ўтказиш режалаштирилган.
ТОШКЕНТ, 19 май — Sputnik. Давлат экологик экспертизаси маркази ва Россиянинг "HPBSolution" МЧЖ ўртасида стратегик ҳамкорлик тўғрисида меморандум имзоланди.
"HPBSolution" вакиллари ўртасида бўлиб ўтган учрашувда ҳамкорликда атроф-муҳитга таъсир кўрсатувчи хўжалик юритувчи субъектлар фаолияти натижасида ҳосил бўладиган иссиқхона газлари миқдори ҳамда углерод изини (cарбон фоотпринт) ҳисоблаш бўйича методика ишлаб чиқиш масалалари муҳокама қилинди.
Шунингдек, халқаро ва миллий тадқиқотларни чуқур таҳлил қилиш ҳамда хорижий давлатлар тажрибаларини ҳар томонлама ўрганиш асосида иқлим ўзгариши оқибатларини юмшатиш ва унга мослашиш бўйича кадрлар салоҳиятини ошириш юзасидан ўқув–семинар, тренинглар ташкил этишга алоҳида эътибор қаратилди.
"Париж келишуви доирасида 2010 йилга нисбатан 2030 йилга келиб ялпи ички маҳсулот бирлигига иссиқхона газлари эмиссиясини 35 фоизга камайтириш бўйича қўшимча мажбурият олдик. Ўзбекистон 2030 йилгача иқтисодиётнинг энергия самарадорлигини икки баравар ошириш бўйича улкан мақсадларни қўйган. 2030 йилга бориб қайта тикланадиган энергия улушини 35 фоизга етказиш, экологик тоза транспортни ривожлантириш чоралари кўрилмоқда", — деди Марказ раҳбари Ғайратжон Мухамедов.
Қолаверса, атроф-муҳитга таъсири бўйича I – IV тоифаларга кирувчи хўжалик юритувчи субъектларнинг фаолиятини белгиланган тартибда давлат экологик экспертизасидан ўтказиш жараёнида углерод нейтраллигини таъминлаш бўйича мақсадли кўрсаткичлар белгиланганлиги қайд этилди.
Бунда фаолият туридан келиб чиқиб, атроф-муҳитга таъсирни баҳолаш материалларида ишлаб чиқариш натижасида ҳосил бўладиган иссиқхона газлари миқдори ҳамда углерод изини (cарбон фоотпринт) камайтиришнинг аниқ кўрсаткичлари лойиҳа паспорти билан белгиланади. Белгиланган кўрсаткичлар асосида углерод изини камайтириш бўйича давлат экологик экспертизаси хулосасида хўжалик юритувчи субъектлар томонидан амалга оширилиши мажбурий бўлган чора-тадбирлар ишлаб чиқилади.
“Учрашувда Давлат экологик экспертизаси маркази ва Россиянинг "HPBSolution" МЧЖ ўртасида стратегик ҳамкорлик тўғрисида меморандум имзоланди”, — дейилади хабарда.
Меморандум қуйидаги масалаларни ўз ичига олган:
марказ ходимларининг малакасини ошириш;
атроф-муҳитга таъсир этувчи тадбиркорлик субъектлари фаолияти натижасида юзага келадиган иссиқхона газлари чиқиндилари ва углерод изларини ҳисоблаш методикасини ишлаб чиқиш;
халқаро ва миллий тадқиқотларни чуқур таҳлил қилиш ҳамда хорижий давлатлар тажрибаларини ҳар томонлама ўрганиш асосида иқлим ўзгариши оқибатларини юмшатиш ва унга мослашиш бўйича кадрлар салоҳиятини ошириш юзасидан ўқув-семинар, тренинглар ташкил этиш.
