Давлат хизматига олинган тадбиркорлар фаолиятини тўхтатиб туриши мумкин бўлади
© Sputnik / Евгений Биятов
/ Oбуна бўлиш
Давлат хизматига қабул қилинган тадбиркорлар фаолиятини тўхтатиб туришнинг ҳуқуқий асослари яратилмоқда
ТОШКЕНТ, 7 дек — Sputnik. Тадбиркор давлат фуқаролик хизматига қабул қилинганидан сўнг тадбиркорлик фаолиятини тўхтатиб туриш тартибини белгилаб берувчи Вазирлар Маҳкамаси қарори лойиҳаси ишлаб чиқилди. Адлия вазирлиги томонидан ишлаб чиқилган ҳужжат Норматив-ҳуқуқий ҳужжатлар лойиҳалари муҳокамаси порталига жойланди.
Лойиҳада қуйидагилар белгиланмоқда:
давлат фуқаролик хизматчиси ўзининг бизнеси мавжудлиги ҳақида ваколатли органларни хабардор қилади ва тадбиркорлик фаолиятини тўхтатиб туришнинг шаклларидан бирини танлайди;
давлат фуқаролик хизматчисига ўзининг меҳнат фаолиятида манфаатлар тўқнашувига йўл қўймаслик бўйича мажбурият юклатилади;
тадбиркорлик фаолиятини тўхтатиб туриш ҳолати Коррупцияга қарши курашиш агентлиги томонидан мониторинг қилиб борилади;
ўзининг бизнеси мавжудлиги фактини яширганлик ҳолатлари аниқланганда, давлат фуқаролик хизматчисига 10 кун муддат берилади ва хизматчи ушбу муддат ичида тадбиркорлик фаолиятини тўхтатади ёки давлат хизматидаги фаолиятини якунлайди.
Давлат фуқаролик хизматчиси тадбиркорлик фаолиятини тўхтатиб туришнинг қуйидаги шаклларидан бирини танлайди:
агар давлат фуқаролик хизматчиси хусусий корхона мулкдори бўлса, корхонадаги раҳбарлик вазифасини бажариб туришни бошқа жисмоний шахс зиммасига юклаш, яъни корхонани вақтинча бошқарувга бериш бўйича қарор чиқариш;
мол-мулкни ишончли бошқарувга топшириш;
тадбиркорлик фаолияти субъектининг муассислари (иштирокчилари) таркибидан ихтиёрий равишда чиқиш.
Фуқаролик қонунчилигига асосан ишончли бошқариш объектлари корхоналар ва бошқа мол-мулк комплекслари, кўчмас мулкка мансуб бўлган алоҳида объектлар, қимматли қоғозлар, алоҳида ҳуқуқлар ва бошқа мол-мулкдан иборат бўлиши мумкин.
Қайд этилишича, давлат хизматига кирганда ўз бизнесини ишончли бошқарувга бериш амалиёти кўпчилик хорижий давлатларда (Қозоғистон, Грузия, Россия Федерацияси, Канада, Жанубий Корея) йўлга қўйилган.
Давлат фуқаролик хизматчиси ўзи ишлайдиган давлат органининг назорат остидаги ташкилот улушларига эгалик қилаётган бўлса, мол-мулкни ишончли (вақтинча) бошқарувга берилишига йўл қўйилмайди. Бундай ҳолларда хизматчи уларни реализация қилиши ёки давлат хизматидан кетиши керак бўлади.
