Сенаторлар ногиронлиги бўлган шахсларнинг ҳимоясини янада кучайтирувчи қонунни маъқуллашди

© Олий Мажлис СенатиСенатнинг ўттиз учинчи ялпи мажлиси
Сенатнинг ўттиз учинчи ялпи мажлиси - Sputnik Ўзбекистон, 1920, 07.10.2022
Oбуна бўлиш
Қонун қабул қилинса, 2023 йилда 75 минг нафар I ва II гуруҳ ногиронлиги бўлган шахсларнинг пенсияларига ўртача 300 минг сўм қўшилади.
ТОШКЕНТ, 7 окт — Sputnik. Сенатнинг ўттиз учинчи ялпи мажлисида ногиронлиги бўлган шахсларнинг ижтимоий ҳимоясини янада кучайтирувчи қонун маъқулланди.
Мажлисда сенаторлар пенсия тайинлаш тартибини такомиллаштиришга қаратилган қонунни муҳокама қилишди.
Қайд этилишича, амалдаги қонунчиликка мувофиқ, I ва II гуруҳ ногиронлик пенсияси тайинлангандан кейинги иш вақти ёшга доир ёки боқувчисини йўқотганлик пенсияси тайинланаётганида стажга қўшиб ҳисобланади.
Бунда, фуқаро пенсия ёшига етганда ёки боқувчисини йўқотганда пенсияни олишни давом эттирса I ва II гуруҳ ногиронлик пенсияси тайинлангандан кейинги иш вақтини қўшиб ногиронлик пенсияси қайта ҳисобланмайди.
Қонунга мувофиқ 2023 йил 1 январдан бошлаб I ва II гуруҳ ногиронлиги бўлган шахсларнинг пенсия тайинланганидан кейинги камида 1 йиллик иш стажи ва иш ҳаки миқдоридан келиб чиқиб ҳар 2 йилда бир маротаба тайинланган пенсия қайта ҳисобланади ҳамда пенсия миқдорига қўшиб борилади.
Қонун қабул қилинса, 2023 йилда 75 минг нафар I ва II гуруҳ ногиронлиги бўлган шахсларнинг пенсияларига ўртача 300 минг сўм қўшилади.
Келгусида меҳнат фаолиятини олиб борганларнинг (бугунги кунда I ва II гуруҳ ногиронлиги бўлган шахсларнинг 43 минг нафари расман банд) пенсияси ҳар 2 йилда бир маротаба иш стажи ва ойлик иш ҳақидан келиб чиқиб, қайта ҳисоблаб борилади.
Қонунга мувофиқ пенсия олиш ҳуқуқи белгиланган ўгай фарзандини
18 ёшгача камида 5 йил тарбиялаган ўгай ота-оналар болани тарбиялаган даврини аниқлаш тартиби, Ўзбекистон Республикаси олдида алоҳида хизматлари бўлган шахсларнинг пенсияларига 100 фоиздан 150 фоизгача миқдорида устамалар тўлаш тартиби белгиланиши кўзда тутилмоқда.
Қонун Сенаторлар томонидан маъқулланди.
Маълумот учун, бугунги кунда Ўзбекистонда 782 минг ёки аҳолининг 2,4 фоизини ногиронлиги бўлган шахс сифатида пенсия ва нафақа олувчилар ташкил этади.
Янгиликлар лентаси
0