Тошкентни кўкаламзорлаштириш бўйича бош режа тасдиқланди
© Sputnik / Sergey Pyatakov
/ Oбуна бўлиш
Халқ депутатлари Тошкент шаҳар Кенгаши қарор билан пойтахтда 2023−2027 йилларда йиллик 7 млн дона мавсумий гуллар ва 75 минг тупдан зиёд кўчатлар экилади.
ТОШКЕНТ, 19 сен — Sputnik. 2023-2027 йилларда Тошкент шаҳрини кўкаламзорлаштириш бўйича бош режа тасдиқланди. Бу ҳақда шаҳар Халқ депутатлари кенгашининг 16 сентябрдаги қарорида белгиланган.
Қарорга кўра, ҳар йили:
7 млн га яқин мавсумий гуллар;
75 мингдан кам бўлмаган миқдорда дарахт кўчатлари ва буталар экилиши назарда тутилмоқда.
Бош режада йил якунига қадар ёғингарчилик мавсумларида шаҳар ҳудудларида сув тўпланиши ва сув тошиши мумкин бўлган манзиллар рўйхатини аниқ шакллантириш ва бартараф қилиш чораларини кўриш назарда тутилмоқда.
Қарор билан қуйидаги вазифалар белгиланмоқда:
2024 йилга қадар пойтахтни яшиллик даражасини 30%га етказиш;
экология ва атроф-муҳитни муҳофаза қилиш бошқармаси ва туман ҳокимликларига атроф-муҳитга таъсири бўйича I ва II тоифага мансуб бўлган корхоналарининг атмосфера ҳавосини ифлослантирувчи стационар манбаларида самарадорлиги 95%дан паст бўлмаган чанг ва газларни тутиб қолувчи қурилмаларни ўрнатилишини назорат қилишни юклатиш;
шаҳар ва туманлар марказлари кўчаларидаги ирригация тармоқларини хатловдан ўтказиб, тармоқларни жорий таъмирлаш ва янгилаш чораларини кўриш;
дарахтларни зараркунанда ҳашаротлардан сақлаб қолиш учун чет эллик мутахассисларни жалб этиш;
2022-2024 йилларда шаҳардан ўтадиган каналларнинг (62 км қисми) қирғоқ бўйларини ободонлаштириш, каналларнинг қирғоқларини мустаҳкамлаш, кўкаламзорлаштириш ва сайилгоҳлар ташкил этиш.
Хужжатга мувофиқ, ободонлаштириш бош бошқармаси тизимидаги ташкилотлар томонидан йилига ўртача 7 млн дона мавсумий гуллар экилиши режалаштирилган. Шу билан бирга йилига 75 минг донадан кам бўлмаган миқдорда дарахт ва бута кўчатларини экиш кўзда тутилган.
