ТОШКЕНТ, 22 дек — Sputnik. Навоий шаҳрида газ ҳисоблагич кўрсаткичларини ўзгартирган хусусий корхона раҳбарига нисбатан жиноят иши қўзғатилди. Бу ҳақда Sputnik агентлигига Бош прокуратура матбуот котиби маълум қилди.
Бош прокуратура ҳузуридаги Департаментнинг Навоий шаҳар бўлими терговга қадар текширув ўтказган. Унда “Н.” хусусий корхонаси раҳбари оҳак ишлаб чиқариш цехида ўрнатилган газ ҳисоблагич кўрсаткичларини ўзгартиргани аниқланган. Газ таъминоти корхонаси манфаатларига 437 млн сўм миқдорида зарар етказилган.
Мазкур ҳолат юзасидан Жиноят кодексининг 185.2-моддаси 4-қисми билан жиноят иши очилган.
Ҳозирда тергов ҳаракатлари ўтказилмоқда.
Эслатиб ўтамиз, аввалроқ Шавкат Мирзиёев энергия ресурсларидан ноқонуний фойдаланганлик учун жавобгарликни кучайтириш таклифини билдиргани хабар қилинган эди.
