ТОШКЕНТ, 20 дек — Sputnik. Қозоғистон президенти Қасим-Жомарт Тоқаев 20 декабрь куни янги коррупцияга қарши курашиш қонунини имзолади. Бу ҳақда Оқўрда матбуот хизмати хабар қилмоқда.
Ҳужжат билан порахўрлик билан боғлиқ оғир ва ўта оғир жиноят содир этган маҳкумларни шартли равишда муддатидан илгари озод қилиш тақиқланмоқда. Шунингдек, қонун билан эндиликда давлат хизматчилари, парламент депутатлари ва судьяларга хорижий банкларда ҳисоб рақамга эга бўлиш тақиқланди, дея ёзади Sputnik Қозоғистон агентлиги.
Қонун Қасим-Жомарт Тоқаев топшириғига биноан тайёрланган ва парламентнинг қуйи ва юқори палатаси томонидан маъқулланган эди.
Эслатиб ўтамиз, аввалроқ Қозоғистонда давлат хизматчиси ва унинг оила аъзоларига совға, моддий мукофот бериш ҳамда хизматлар кўрсатиш тўлиқ тақиқлангани хабар қилинган эди.
