ТОШКЕНТ, 20 дек — Sputnik. Россияда коронавирус пандемияси баҳорга келиб тугайди. Роспотребнадзор раҳбари Анна Попова шундай тахминни билдирди.
“Баҳорга келиб якунланади, агар ҳаракат қилсак, ундан олдин ҳам тугаши мумкин. Бугунги кунда ҳар биримизга боғлиқ”, - деди Попова “Россия 1" телеканалига берган интервьюсида.
Аввалроқ Россия фанлар академияси (РФА) президенти Александр Сергеев турли вакциналарни қўллаш коронавирус пандемиясининг устидан ғалаба қозонишга ёрдам беради деган фикрни билдирган эди.
Ҳозирда Россиянинг ҳар бир ҳудудида аҳолини коронавирусга қарши оммавий эмалаш ишлари бошлаб юборилган. Биринчи навбатда хавф гуруҳига кирувчилар (тиббиёт ходимлари, ўқитувчилар, ижтимоий хизмат соҳаси вакиллари ва бошқалар) эмланмоқда.
Россияда коронавирусга қарши иккита вакцина рўйхатга олинган. Бу Гамалея марказининг “Спутник V” ва “Вектор”марказининг “ЭпиВакКорона” вакцинаси. Яқин кунларда Чумаков номидаги Илмий марказ вакцинаси ҳам рўйхатга олиниши кутилмоқда.
