ТОШКЕНТ, 18 ноя - Sputnik. Бугун, 18 ноябрда Ўзбекистон пойтахтида ёққан қор туфайли Тошкент кўчалари "тўхтаб қолди".
"Яндекс.Карты" хизмати автомобил йўлларида ўн баллик тирбандлик юзага келганини кўрсатмоқда.
"Машиналар одамлар каби юряптими", - дея ҳайратини яширмайди ёшгина талаба қиз Нигора. Чиндан ҳам, жамоат транспортлари қатнови сустлашган, автомобиллар ҳам деярли одамдай одимлар эди.
Тирбандлик кучлилигидан айрим автобуслар бекатларда тўхтамади, йўловчилар жуда секин ҳаракатланаётган автобусга чиқишга мажбур бўлган ҳолатлар ҳам кузатилди.
"Ҳеч ким бундай бўлишини кутмаганди, қор яхши, аммо уч соат деганда ўз манзилимга етиб олдим", - дея йўллардаги пробкаларга муносабат билдиради Мухтор исмли ҳайдовчи.
Синоптикларнинг айтишича, минус даража Ўзбекистон пойтахтида яна бир неча кун ушланиб туради.
Дарвоқе, мактаблардан фарзандини олиб қайтаётган автоуловли ота-оналар, қолаверса, иш билан кўчага чиққан фуқаролар ҳам такси кутиб турган ёш болали инсонларга ёрдам қўлини чўзиб - манзилларига бепул элтиб ташлашмоқда. Йўллардаги бесаранжомлик ва таксичиларнинг йўл пулини уч карра ошириб олишгани фонида бу ҳамжиҳатлик инсонийлик намунасидир.
