ТОШКЕНТ, 2 ноя — Sputnik. Жаҳон соғлиқни сақлаш ташкилоти (ЖССТ) бош директори Тедрос Адханом Гебрейесус коронавирус билан касалланган киши билан мулоқотда бўлгани сабаб ўзини ўзи яккалаш тартибига риоя қилишини маълум қилди. Бу ҳақда у Twitter᾽да ёзди.
Гебрейесуснинг сўзларига кўра, у ўзини яхши ҳис қилмоқда ва унда касалликнинг ҳеч қандай аломати йўқ.
“ЖССТ баённомаларига мувофиқ, бир неча кун ўзимни яккалайман ва уйдан туриб ишлайман”, - дея маълум қилди ташкилот раҳбари.
Шунингдек, у коронавирус тарқалишига қарши курашиш талабларини қатъий бажариш зарурлигини таъкидлади.
“Айнан шундай биз COVID-19 юқиши занжирини узамиз”, - деди у.
Коронавирус пандемия бошлангандан буён дунёда 46 миллиондан зиёд киши касалланди. 1,18 миллиондан зиёд киши вафот этди.
