ТОШКЕНТ, 22 авг - Sputnik. Давлат статистика қўмитасида Ўзбекистонда аҳолини рўйхатга олишга оид меъёрий-ҳуқуқий ҳужжатларда белгиланган вазифалар ижроси бўйича амалга оширилаётган ишлар муҳокама қилинди ва устувор вазифалар белгилаб олинди, деб хабар бермоқда Sputnik Ўзбекистон мухбири.
Тадбирда статистика маълумотларининг шаффофлиги, ошкоралиги ва қулайлигини оширишни таъминлаш бўйича фикр-мулоҳаза алмашилди. Шунингдек, Жаҳон банки кўмагида ишлаб чиқилган "2020–2025- йилларда Ўзбекистон Республикаси статистикасини ривожлантиришнинг миллий стратегияси" хусусида батафсил сўз юритилди.
Аҳолини рўйхатдан ўтказиб, Ўзбекистон тенгсизликка барҳам беради - Фрейзер >>>
Қўмита марказий аппарати ва ҳудудий статистика бошқармаларида рўйхатга олиш жараёнларини ташкил этиш ва ўтказишга масъул бўлган янги бўлинмалар иш фаолиятини йўлга қўйиш ва унинг вазифаларини белгилаш бўйича таклиф ва тавсиялар берилди.
Эслатиб ўтамиз, аҳолини рўйхатга олиш ишлари 2022 йилнинг кузида ўтказилиши режалаштирилган. Ўзбекистонда аҳолини рўйхатга олиш ишлари сўнгги марта 1989 йилда ўтказилган.
