ТОШКЕНТ, 5 май — Sputnik. Самарқанд вилоятида рўй берган мудҳиш йўл транспорт ҳодисасида икки киши ҳаётдан кўз юмди.
Тергов департаменти хабарига кўра, ҳодиса 4 май куни Ургут тумани “Тинчлик” маҳалласи ҳудудидан ўтувчи А-377 автомобиль йўлининг 33 километрида содир бўлган.
“ВАЗ-2106” ҳайдовчиси 27 ёшли Ф.Р. маст ҳолатда Самарқанд йўналиши томонидан Тожикистон йўналиши томонга қараб келаётган вақтида ўзига қарама-қарши йўналишдан ҳаракатланиб келаётган ҳайдовчи 29 ёшли З.А.нинг бошқарувидаги “Газ-5327” русумли юк автомашинасининг ўнг ён томонига урилиб, йўл транспорт ҳодисаси содир қилган.
“Тўқнашув натижасида “Газ-5327” русумли юк автомашина йўловчилари (ҳайдовчининг турмуш ўртоғи ва фарзанди) 22 ёшли Д.С. ва вояга етмаган 2 ёшли А.Н.лар оғир тан жароҳати олиб ҳодиса жойида вафот этганлар”, - дейилган хабарда.
Ҳолат юзасидан Жиноят кодексининг 266-моддаси 3-қисми “а” банди билан жиноят иши қўзғатилган. Суриштирув ишлари давом этмоқда.
