ТОШКЕНТ, 19 апр — Sputnik. Ахборот технологиялари соҳасидаги йирик олим, Ўзбекистон Фанлар академиясининг академиги Жўра Абдуллаев шу йил 18 апрель куни 93 ёшида вафот этди. Президент унинг вафоти муносабати билан таъзия билдирди.
Жўра Абдуллаев 1927 йил 21 февралда Тошкент шаҳрида туғилди.
1953 йилда Ўрта Осиё политехника институти (ҳозирги Тошкент давлат техника университети)ни тугатиб, Россия Фанлар академиясининг Автоматика ва телемеханика институти аспирантурасида таҳсил олди. 1959 йилда номзодлик, 1974 йилда докторлик диссертациясини ҳимоя қилди. 1989 йилда Ўзбекистон Фанлар академиясининг академиги этиб сайланди.
Абдуллаев ўз меҳнат фаолиятини 1956 йили Ўзбекистон Фанлар академиясининг Энергетика ва автоматика институтининг кичик илмий ходими сифатида бошлади. Ушбу масканда катта илмий ходим, лаборатория мудири лавозимларида самарали меҳнат қилди. Кейинчалик Ўзбекистон Олий ва ўрта махсус таълим вазири, Тошкент электротехника ва алоқа институти (ҳозирги Тошкент ахборот технологиялари университети) ректори, Ўзбекистон Фанлар академиясининг президенти вазифасини бажарувчиси, механика ва информатика фанлари бўлими раиси, Информацион технологиялар ва коммуникацияларни ривожлантириш вазирлигининг Фан-техника ва маркетинг тадқиқотлари маркази бош илмий ходими каби масъул вазифаларда самарали хизмат қилиб, республикада малакали илмий кадрлар тайёрлаш, замонавий илм-фан тармоқларини ривожлантиришга муносиб ҳисса қўшди.
Заҳматкаш олимнинг ахборот технологиялари соҳасининг назарий ва амалий масалаларига бағишланган кўплаб мақолалари, китоб ва монографиялари мамлакат ва хорижий мамлакатлар илмий жамоатчилиги ўртасида яхши маълум. Унинг бир қатор илмий ишланмалари иқтисодиёт тармоқларида муваффақиятли қўлланиб келмоқда.
Жонкуяр устоз, моҳир педагогнинг бевосита раҳбарлигида ўнлаб фан номзодлари ва фан докторлари тайёрланган.
Академик Жўра Абдуллаевнинг мамлакат илм-фанини ривожлантириш борасидаги хизматлари давлат томонидан муносиб баҳоланди. У “Ўзбекистонда хизмат кўрсатган фан арбоби” фахрий унвони, “Меҳнат шуҳрати” ордени ва “Шуҳрат” медали билан мукофотланган эди.
“Атоқли олим, меҳрибон устоз, камтарин инсон Жўра Абдуллаевнинг хотираси қалбларимизда ҳамиша сақланиб қолади”, - дейилади президент матбуот хизмати хабарида.
