ТОШКЕНТ, 10 апр - Sputnik. “Ўзбеккино” Миллий агентлиги Ўзбекистонда коронавирусга қарши курашга бағишланган фильм суратга олишни бошлади.
Фильм кинохроника кўринишида бўлиб, унда вируснинг Ўзбекистонда тарқалиши, шунингдек COVID-19 пандемиясига қарши курашда ҳукумат томонидан қабул қилинган чора-тадбирлар акс эттирилади. Унда коронавирус билан касалланганлар учун қурилаётган шифохоналар ҳақида лавҳалар, ҳукумат аъзолари, тиббиёт ходимлари, экспертлар, ҳуқуқ-тартибот идоралари вакиллари ҳамда тузалиб чиққан беморларнинг интервьюларига кенг ўрин берилади, - дейилган хабарда.
Миллий агентлик бош директори Фирдавс Абдухолиқов айтишига қараганда "Ўзбеккино" ушбу мудҳиш пандемияга қарши қаратилган кенг қамровли чора-тадбирларни кўрсатиб берувчи видематериаллар базасини ҳам яратади. Ана шу база туфайли келгусида тадқиқотчилар ва экспетлар COVID-19га қарши курашда Ўзбекистон тажрибасини ўрганишлари мумкин бўлади.