Паразитларга қарши дори воситаси ҳисобланган ивермектин - антивирус таъсирга эга ва 48 соат ичида ҳужайраларда SARS-CoV-2 кўпайишини бостиришга қодир, дея таъкидламоқда Австралиянинг Монаш университети ва Мельбурн шаҳридаги Қироллик шифохонаси олимлари. Хулосалар Antiviral Research нашрида эълон қилинган.
Тадқиқотчилар инфекцияга чалинган кишига у зарарлангандан сўнг икки соат ўтгач, ивермектин препаратини қўлладилар ва вирус билан зарарланган ҳужайралардаги дори таъсирини таҳлил қилдилар. Маълум бўлишича, препаратнинг битта дозасидан сўнг 24 соат ўтгач, вирусли РНК миқдори ҳужайраларда 93%га, икки кундан кейин эса 99%га камайган. Шу билан бирга, тажриба давомида ивермектин намуналарга заҳарли таъсир кўрсатмаган.
Н.Ф. Гамалея номидаги РФ ССВ Миллий эпидемиология ва микробиология илмий маркази профессори, кафедра мудири Александр Бутенко Sputnik радиоси эфирида ушбу кашфиётнинг аҳамиятини баҳолади.
Онаизор коронавирусдан вафот этган ўғлининг сўнгги сўзлари билан бўлишди >>>
"Агар бир суткадан кейин вирус юки сезиларли даражада камайиб, 48 соатдан кейин янада кўпрок пасайган бўлса, бу жуда жиддий. Тўғри, танадаги вирусларни аниқлашнинг специфик усуллари назорати остидами ёки йўқ, текшириш керак. Шунингдек, клиник кузатувлар (керак)... Ҳозирча буларнинг барчаси ҳужайраларда, ҳайвонлар ёки одамларнинг танасидан ташқарида кузатилган ва баъзида бу беморларга қўлланилганда, терапевтик таъсир бермайди", - деди Александр Бутенко.
У шунингдек, тажриба вақтида, препарат намуналарга заҳарли таъсир кўрсатмаганига алоҳида эътибор қаратди.
"Демак, бу цитотоксик эмас, яъни ҳужайралар ундан ҳалоқ бўлмайди. Бу далда берувчи маълумот, демак, даволаш мақсадида одамларда қўллаш учун салоҳиятли эканлигини англатади. Энди биз унинг қанчалик самарадор эканлигини тушунишимиз керак, клиник тадқиқотлар керак. Баъзида шундай бўладики, ҳужайраларда яхши натижа кўрсатгани билан беморларни даволашда баъзи сабабларга кўра, натижа бермайди", - дея огоҳлантиради Александр Бутенко.
Бутунжаҳон соғлиқни сақлаш ташкилоти 11 март куни ўтган йил декабр ойида Хитойнинг Ухань шаҳрида қайд этилган SARS-CoV-2 вируси (COVID-19 қўзғатувчиси) тарқалишини пандемия, деб эълон қилди. Ташкилот маълумотларига кўра, бугунги кунда дунё бўйича 1,3 миллиондан ортиқ одам коронавирусга чалинган.
