ТОШКЕНТ, 13 мар – Sputnik. Ўзбекистон журналистика ва оммавий коммуникациялар университети ректорининг буйруғига кўра, вирусли ҳолатларни олдини олиш мақсадида ҳар қандай тактил алоқа шакллари университет ҳудудида тақиқланган. Бу ҳақда университет веб-сайтида эълон қилинган.
“ЎзЖОКУ ректорининг буйруғига кўра, эндиликда ҳар қандай тактил алоқа шакллари тақиқланади. “Ўзини асраганни Худо асрайди” деб бежиз айтишмайди. Келинг, соғлиғимизни асрайлик — қўлимизни тез- тез ювиб, ҳар қандай вирусли бахтсизликдан эҳтиёт чораларини кўрайлик!”, дейилади университет огоҳлантиришида.
Эслатиб ўтамиз, бундан аввал “Ньюкасл” футбол клуби бош мураббийи Стив Брюс коронавирусдан ҳимояланиш чораси сифатида клуб футболчилари орасида қўл бериб кўришишни тақиқлаганди.
Сўнгги маълумотларга кўра, дунё бўйлаб 110 тадан зиёд мамлакатда 125 минг киши коронавирус билан касалланган, улардан 4625 нафари вафот этган, 68 мингдан ортиғи соғайиб кетди.
Шу ҳафтада Жаҳон соғлиқни сақлаш ташкилоти дунёда янги коронавирус COVID-19 пандемиясини эълон қилганди.
