ТОШКЕНТ, 11 мар — Sputnik. “Ўзтемирйўловчи” АЖ электрон чипталарни замонавий технологиялар QR-код орқали текширувчи махсус мосламаларни синовдан ўтказишни бошлади. Бу ҳақда Транспорт вазирлиги хабар қилди.
Қайд этилишича, айни дамда янги мосламалар Тошкент-Марказий” вокзалида “Афросиёб” поездларининг бирида синовдан ўтказилмоқда.
“Электрон чиптани расмийлаштирган йўловчиларга энди уни А-4 форматида чоп этиш зарурати йўқ, яъни электрон чиптани смартфон ёки планшетларда тақдим этишнинг ўзи кифоя”, - дейилган хабарда.
Назорат-ўтказиш пункти ходимлари ҳамда вагон кузатувчилари электрон чиптанинг ҳақиқийлигини махсус мослама билан текширади, кейин эса йўловчи чипта бўйича ўз жойини эгаллаши мумкин бўлади.
Бутун Ўзбекистон бўйлаб темир йўл станцияларида валидаторлар ўрнатиш режалаштирилмоқда
Кейинчалик тизим барча вокзалларда жорий этилиши режалаштирилган. Синов ишлари март ойининг охиригача давом этади.
Эслатиб ўтамиз, аввалроқ Ўзбекистон поездларида "кичик интернет" ишга тушиши ҳақида хабар қилинган эди.
