ТОШКЕНТ, 7 мар — Sputnik. Тошкент шаҳрида 7 мартдан Хитойнинг Yutong компаниясининг электробуси 51-йўналишда ўзининг дастлабки қатновини бошлайди. Бу ҳақда “Тошшаҳартрансхизмат” хабар қилди.
ZK6128BEVG моделидаги мазкур электробус 215 к/ват билан ҳаракатланади. Бир марта олинган қувват билан 300 километрдан зиёд масофани босиб ўтади. Электробус салони 5 та кузатув камераси ҳамда монитор билан жиҳозланган. Ундан ташқари двигатель қисмига ёнғинга қарши автомат тарзда ишловчи ускуна ўрнатилган.
Шунингдек, кондиционер, иситиш тизими билан таъминланган. 12 метр узунликдаги мазкур электробус ўртача 70 нафар йўловчига мўлжалланган.
Таъкидланишича, мазкур электробус мамлакат иқлим шароитида автобус йўналишларида бир неча ой давомида синовдан ўтказилади.
Эслатиб ўтамиз, авввалроқ пойтахтда Беларусдан келтирилган электробус 3 ой давомида йўналишда синовдан ўтказилган эди.
