ТОШКЕНТ, 25 фев — Sputnik. Дунёнинг 500 нафар энг бадавлат кишилари 25 февраль, душанба куни 139 миллиард доллар йўқотишди. Бу ҳақда Bloomberg агентлиги хабар қилди.
Таъкидланишича, ушбу йўқотиш 2016 йилдан буён энг йирик саналади.
Louis Vuitton Moet Hennessy компаниялар гуруҳи бош директори Бернар Арно ва Amazon раҳбари Жефф Безосларнинг ҳар бири 4,8 миллиард долларданайрилди. Zara савдо тармоғи эгаси Амансио Отрега 4 миллиард, Facebook асосчиси Марк Цукерберг эса 3,48 миллиард долларга “камбағаллашди”.
Дастлабки ўнталикдаги қолган миллиардерларнинг бойлиги камида 2,3 миллиард доллардан камайган.
АҚШда биржа савдолари душанба куни янги коронавируснинг тарқалиши жаҳон иқтисодиётига зарар етказиши эҳтимоли хавотири боис тушиб кетди.
Инвесторлар COVID-19 тарқалиши кўламидан хавотирланишмоқда, чунки касалликнинг авж олиши ва карантин чоралари Хитой ва бутун жаҳон иқтисодиёти учун хавф туғдирмоқда.
