ТОШКЕНТ, 7 фев – Sputnik. Қозоғистон Олий муфтийси Серикбай ҳожи Ораз соғлиғи ёмонлашгани туфайли истеъфога чиқди. Унинг ўрнига Науризбай ҳожи сайланди. Бу ҳақда Sputnik Қозоғистон хабар қилди.
Серибай ҳожи ўз истеъфоси ҳақида “Ҳазрат Султон” масжидида ўтказилган Қозоғистон мусулмонлар идораси IX қурултой йиғилишида маълум қилди.
Серикбай ҳожи 2017 йил 8 декабрда Қозоғистон Мусулмонлар идораси раиси этиб сайланганди.
У ўзининг ўрнига Науризбай ҳожини таклиф қилди.
Науризбай ҳожи 2018 йил октябрдан бери мамлакат Мусулмонлар идораси раисининг биринчи ўринбосари, Нур-Султон шаҳри бўйича идора вакили, “Ҳазрат Султон” масжиди бош имоми лавозимида фаолият кўрсатган.
У Тошкентдаги Имом Ал-Бухорий номидаги ислом институти (1993-1997 й.), Қозоғистон мусулмонлар идораси қошидаги ислом институтида (1999-2001 й.) таҳсил олган.
2009 йилда Мисрда ўз малакасини оширган. 2010 йилда Абай номидаги Олма-Ота давлат университетии тарих факультетини, 2011-2013 йилларда эса олийгоҳнинг “диншунослик” мутахассислиги магистратурасини тамомлаган.
