ТОШКЕНТ, 20 янв — Sputnik. Шавкат Мирзиёев Ўзбекистон Олий Мажлиси Қонунчилик палатасининг биринчи мажлисида депутатларни ўз сайловчилари билан боғлаш имкониятини берадиган электрон портал ва мобил иловаларни ишга тушириш таклиф қилди. Бу ҳақда Sputnik мухбири хабар қилмоқда.
Мажлисда сайловчи ва депутатнинг ўзаро муносабатларига ахборот технологияларини кенг жорий этиш, интернет тармоғи орқали парламент ва депутат сўровини шакллантириш амалиётини йўлга қўйиш даркорлиги таъкидланди.
“Халқ билан мулоқот тизимини мутлақо янги босқичга олиб чиқиб, депутатларни ўз сайловчилари билан боғлаш имкониятини берадиган электрон портал ва мобил иловаларни ишга тушириш лозим. Токи ана шу тизим орқали сайловчи депутатнинг кундалик ишини кузатиб бориш, қонун лойиҳаларини муҳокама қилиш ва улар бўйича ўз фикр ва мулоҳазаларини билдириш имконига эга бўлсин. Яъни, депутат фаолиятига унинг сайловчилари бевосита баҳо берсин. Ана шундагина фуқаро ва парламент ўртасида халқимиз биздан кутаётган ҳақиқий кўприк пайдо бўлади”, – деди президент.
Шунингдек, “Менинг фикрим” веб-портали ишини такомиллаштириш, унга тушаётган мурожаатларни телевидение ва бошқа оммавий ахборот воситаларида депутатлар, мутахассислар, кенг жамоатчилик иштирокида муҳокама қилиш мақсадга мувофиқлиги таъкидланди.
