Сергелидаги кўп қаватли уйларда иккита янги боғча очилди

ТОШКЕНТ, 25 ноя – Sputnik. Мактабгача таълим вазирлиги томонидан Сергелида иккита янги боғча очилди, деб хабар қилмоқда вазирлик матбуот хизмати.

“23 ноябрь куни Сергели туманида жами 370 ўринга эга бўлган иккита боғча очилди. Янги боғчалар кўп қаватли уйларнинг биринчи қаватида  жойлашган бўлиб, аҳоли зич жойлашган ҳудудлар учун жуда қулай,”- дейилган вазирлик хабарида.

Боғчалар очилиш маросимида мактабгача таълим вазири Агриппина Шин иштирок этди.

40-сонли боғча Спутник-16 массивида жойлашган бўлиб унда 3 гуруҳда 90 нафар бола тарбияланиши мумкин.  Болалар билан 10 нафар педагог ва 8 нафар ёрдамчи персонал ишлайди.

41-сонли боғча Сергели-7 массивида жойлашган бўлиб, унда 4та тўлиқ кун гуруҳлари ва 4та қисқа муддатли гуруҳлар ташкил қилинган. Бочада 13 нафар педагог ва 10 нафар ёрдамчи тарбиячилар ишлайди.