ТОШКЕНТ, 10 ноя — Sputnik. Қорақалпоғистон республикаси Амударё туманида “Газ 52” юк машинаси йўл қатнов қисмининг четида ўтирган икки нафар фуқарони уриб юборди.
ИИВ ҳузуридаги Тергов департаменти хабарига кўра, 9 ноябрь куни тахминан соат 02:00 ларда 40 ёшли ҳайдовчи Е.А. машинасини Амударё вилояти “Ғузор-Бухоро-Нукус-Бейнеу” А-380 автомобиль йўлининг 727 километрда бошқариб кетаётиб, йўл қатнов қисмининг ўнг четида ўтирган икки нафар фуқаро 40 ёшли Б.К. ва 39 ёшли К.А. ларни уриб юборган.
Натижада Б.К. олган тан жароҳатлари сабабли ҳодиса жойида, К.А. эса тиббиёт бирлашмасига олиб кетилаётган вақтда вафот этган.
Мазкур ҳолат юзасидан Ўзбекистон ЖКнинг 266-моддаси 3-қисми “а” банди (одамлар ўлимига олиб келган, транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган ҳамда ҳайдовчи гумон сифатида сўроқ қилинган
Ҳозирда жиноят иши бўйича тегишли экспертизалар тайинланиб, дастлабки тергов ҳаракатлари олиб борилмоқда.
