ТОШКЕНТ, 1 ноя - Sputnik. Яқин кунларда Ўзбекистонга биринчи қиш совуғи кириб келади, деб хабар қилмоқда Гидрометеорология маркази.
“3 – 5 ноябр кунлари Ўзбекистон ҳудудида Ғарбий Қозоғистондан совуқ ва нам ҳаво оқими кириб келади. Айрим ҳудудларда тунда ҳаво ҳарорати -3 даражагача совуқ бўлиши мумкин”, - дейилган хабарда.
Ўзбекистон ҳудудида 4−5 ноябр кунлари ҳаво ҳарорати тунда 0 ... +5 даражагача тушиши, тоғли ҳудудларда -1...-2 даражагача совиб кетиши мумкин. Кундузи ҳарорат +8…+13 даража бўлади.
Шимолий ҳудудларда тунда ҳаво ҳарорати −3…+2 даража, кундузи +3…+8 даражани ташкил қилиши мумкин.
Қорақалпоғистон ва Хоразм ҳудудида 3 – 4 ноябр кунлари ёмғир ёғиши кутилмоқда. Шамол тезлиги 18−23 м/с дан 25−28 м/с гача бўлиши мумкин.
Эслатиб ўтамиз, Туркманистон томонидан эсган совуқ шамол туфайли Ўзбекистонда илк ёмғирлар 30 октябрда бошланган эди.
