ТОШКЕНТ, 23 окт — Sputnik. Самарқанд вилояти Паст Дарғом туманида вилоят, туман ва шаҳар маъмурий суд судьялари ва ходимларининг 60 нафаридан зиёди пахта теримида қатнашди, хабар қилади Республика Олий суди.
“Зафар” фермер хўжалиги даласига умумий ҳисобда 65 киши ишга чиқди. Бир кунда улар 1,63 тонна пахта терди.
Бундан бир неча ҳафта илгари Хотин-қизлар қўмитаси раҳбари Эльмира Боситхонова ҳам пахта теримида иштирок этганди. У маҳаллий аҳоли ва ишчи аёллар билан суҳбатлашиб, терим якунида уларга рамзий совғалар тақдим этган эди.
Эслатиб ўтамиз, Ўзбекистон пахтани ишлаб чиқариш бўйича жаҳоннинг биринчи ўнталигига ва пахта толасининг сифати бўйича биринчи бешталигидан ўрин эгаллаган. Ўзбек пахтасини энг фаол Хитой Халқ Республикаси харид қилади.