ТОШКЕНТ, 11 авг — Sputnik. Сурхондарё вилоятининг Термиз шаҳридан “Ўзбекистон — Тожикистон — Хитой” йўналишида янги траспорт йўлаги бўйича тажриба-синов автокарвони йўлга чиқди.
Мазкур автокарвонда ҳар учала давлатдан иккитадан катта ҳажмли юк автомобиллари иштирок этишмоқда. “Termez Cargo Centr” логистика терминалидан юк ортган жами 6 та автомобиль “Термиз (Ўзбекистон) – Душанбе, Ваҳдат, Кўлоб, Қалъаи Хумб, Хоруғ, Кулма (Тожикистон) – Қашғар (Хитой) йўналишида ҳаракатланиб умумий ҳисобда 1422 км масофани босиб ўтади.
“Ушбу лойиҳа автомобиль транспортида халқаро ташишларни амалга ошириш йўналишида давлатлар ҳамкорлигини янада ривожлантириб, савдо- иқтисодий алоқаларнинг мустаҳкамланишига ўзининг ижобий ҳиссасини қўшади”, - дейилади Транспорт вазирлиги хабарида.
“Термиз — Душанбе — Қашғар” йўналиши бўйича ташкил этилаётган ушбу автокарвон Ўзбекистон президентининг 2019 йил 6 апрелдаги “Юк ва йўловчи ташиш тизимини тубдан такомиллаштириш чора-тадбирлари тўғрисида”ги қарорида белгиланган вазифалар ижросини таъминлаш юзасидан амалга оширилмоқда.
