ТОШКЕНТ, 5 июл - Sputnik. GM Uzbekistan ўз номини ўзгартиргани билан, бу унинг иш сифатига таъсир этмайди. Янги ўзгаришлар бизга янги моделларни ўзлаштириш учун йўл очмоқда, деди Асака шаҳрида ОАВ вакиллари учун ўтказилган пресс-тур давомида Uzauto Motors бош директори вазифасини ижро этувчи Рустам Ражабов.
Ражабовнинг айтишича, иккиёқлама имзоланган "Альянс GM Uzbekistan" халқаро ҳужжатига кўра, GM Ўзбекистон бозорини тарк этгани йўқ. У техник кўмак беришда давом этади ва автомобиллар, двигателлар ҳамда комплектловчилар ишлаб-чиқарилиши учун компонентларни етказишда давом этади. "Ўзавтосаноат" эса General Motorsнинг айрим моделларини ишлаб чиқаришда давом этади.
"GM кетди, деб ёзишяпти, йўқ, у кетмади. Иш фаолиятимиз ўзгармади, ном ўзгарди, холос. "GM қолса бўлмасмиди?", деб савол беришаяпти. Йўқ, қолса бўлмасди. Ўтган йили биз бу ҳақда айтган эдик. GM ўз улушини Ўзбекистон ҳукуматига сотди. Эндиликда бу туфайли маҳсулотларни маҳаллийлаштиришни чуқурроқ амалга оширадиган тизимга ўтдик. Ушбу ребрендинг Ўзбекистон учун фойдали бўлади. Мисол учун, илгарилари GM билан ишлаганимизда, уларнинг катта-катта техник марказлари бор эди, улар ҳамма нарсани ихтиро қиларди, биз ҳеч нарса қилолмасдик. Ҳатто машинани фараси ёхуд рангини ҳам ўзгартиролмасдик. Бунинг учун Америкага ёки Кореяга чиқишга тўғри келарди. Мана бугун биз бу борада мустақилликка эга бўлдик", - дея тушунтирди Ражабов.
Эслатиб ўтамиз, илгарироқ GM Uzbekistan Chevrolet Equinox кроссовер ва Сhevrolet Trailblazer йўлтанламасининг тақдимотини ўтказган эди.
"Альянс GM Uzbekistan" концепциясини ривожлантириш доирасида маслаҳат ва техник кўмак тақдим этишга йўналтирилган GM Advisory Services компанияси ташкил этилади. Ушбу ўзгаришлар Ўзбекистондаги енгил автомобиллар бозорини монополиядан чиқариш ва Chevrolet дан ташқари янги брендларни яратишга қаратилган.
